上海人讲做人要“乐开”！啥意思呢？就像北方人讲个“豁达”一样，指说话做事有理有据，为人处世公正大方。 

阿拉老底子住辣像七十二家房客个石库门里，用水、用电侪是公用计量，就是一幢房子只有一只大电表、一只大水表，供电局搭仔水务局抄表以后只出一张账单，具体每家每户需要支付多少费用，由居民自行分摊。搿桩计算分摊费用个工作是每家每户轮流来做嗰，所有数据全部记录辣一本账簿浪，账簿辣各家各户之间流转。有个房子比较老旧，每家每户呒没安装单独个小电表、小水表，就按照各家人数、灯头数分摊。有个房子经过改造，每家每户安装了单独个小电表、小水表，就先记录所有小电表、小水表个读数，再用大表数字减去所有小表数字，余数再由各户分摊。由于楼道公用部位需要用电用水，差额还是蛮大嗰。计算分摊费用个辰光，经常会遇到“除不尽”个余数，譬方十户人家摊下来还差五分钱，每家多收一分则会多收五分钱，收费“乐开”个人家就勿声勿响自家贴进钞票，阿拉前楼个蔡家伯伯就常常搿能做。蔡伯伯认为，长久生活辣一道，犯勿着斤斤计较，反映出来就是人品。反过来后厢房里小三子就暗黜黜“揩油”，多余几分洋钿伊就捞进自家口袋。搿排事体做得多了总要生出矛盾，小三子还强词夺理讲，为大家服务，应该拿点劳务费。 

做人“乐开”勿仅表现辣物质浪勿计较，体现辣精神层面也是一种“风度”。有趟我辣儿童乐园里看到两个勿相识个小朋友一道白相，男孩大一点，伊姆妈辣旁边静静看着。小姑娘小点，白相辰光突然跌倒哭了。男孩姆妈马上过去扶起小姑娘，迭辰光小姑娘个阿爸从稍远地方赶过来，双方察看自家小人情况，还好无碍，两位家长就带仔小囡走开了。本来就是一桩小事体，后来却闹得邪气勿开心。两位家长分开一歇以后又碰着了，小姑娘个阿爸讲，小姑娘伤心哭勿停，要叫小男孩道歉？男孩姆妈顿感奇怪：“阿拉小人呒没碰伊，伊自家跌倒，凭啥要阿拉道歉？”双方争得面红耳赤，还好有旁观家长出来作证，才偃旗息鼓。 

小朋友天真活泼，一道白相难免有争执磕碰。一方面家长要对尽到照看监管个义务，另一方面只要勿是故意使坏，呒没啥严重后果，家长处理起来还是“乐开”一点为好，勿但反映自身品行，还会潜移默化影响到小朋友。做人啊，“乐开勿乐开”大有讲究。

摘自2023-12-10  新民晚报网  作者：侯宝良